माळकवठे येथील आराध्य दैवत श्री गुरु पंचाक्षरी यांच्या वार्षिक यात्रेनिमित्त आयोजित करण्यात आलेल्या भव्य कुस्ती मैदानात मल्ल रियाज नदाफ याने ‘पंचाक्षरी केसरी’ हा मानाचा किताब संपादन केला. अत्यंत अटीतटीच्या झालेल्या या कुस्तीत रियाजने आपल्या प्रतिस्पर्ध्यावर नेत्रदीपक विजय मिळवत उपस्थितांची मने जिंकली.
ऐतिहासिक विजयाबद्दल नूतन जिल्हा परिषद सदस्य माननीय श्री. महेंद्र उंबरजे यांच्या हस्ते आणि मार्गदर्शनाखाली विजेत्या मल्लास २१,००० रुपये रोख पारितोषिक आणि सन्मानचिन्ह देऊन गौरविण्यात आले. ग्रामीण भागातील कुस्ती परंपरेला उजाळा देण्यासाठी आणि तरुण मल्लांना प्रोत्साहन देण्यासाठी माळकवठे ग्रामस्थांच्या वतीने या भव्य कुस्ती मैदानाचे आयोजन करण्यात आले होते.
या गौरव सोहळ्याप्रसंगी श्री. दत्तात्रय कुलकर्णी, संगप्पा केरके, श्री. प्रसाद कुलकर्णी, खुतुब शेख आणि साहेबलाल हवालदार यांची प्रमुख उपस्थिती लाभली. तसेच चांद शेख, बिळेनी थोरात, दयानंद कोळी, सुधाकर लवटे, सुभाष मिरेखोर, सतीश कट्टीमनी, महेश बगले, गिरीश थोरात, शाम येळगे, सागर मदने यांसह अनेक मान्यवर, क्रीडा प्रेमी आणि ग्रामस्थ मोठ्या संख्येने उपस्थित होते.
